Mail us Rüderswil

I zwe Tag isch es also sowyt. Üses Fescht steit vor der Türe. U wiu mir i all de Vorbereitige grad no chli Zyt blibt, gits es paar Informatione zu üsem Iladigs-Chärtli. Das hei mir nämlich sälber baschtlet u gsätzlet. U die Arbeit het üs viu Fröid gmacht!

Ja gwüss, am Afang isch es üs no nid ganz wohl gsi derbi. Äbe, es isch ja ds erscht Mal gsi, dass mir vor so ne Ufgab gstellt si gsi… Aber scho gli einisch isch druf d’Idee mit däm transparänte Papier cho. Uf ere dunkle Vorlag gseht das richtig schön us; ja scho fasch e chli fürnähm. O d’Farb vom Chärtli isch eso glin druf gfunge worde: es dunkus, satts blau. Mit Rat u Tat ghulfe bi der Uswahl het üs d Frou Aebi vom Basar Créatif z’Hutwiu. Drum wei mir ihre o a dere Stell no einisch Danke säge.

Einladung1

Üsi Iladig

Aber itz, was drufschribe uf das Iladigs-Chärtli? Das het üs druf grad no einisch z’däiche gäh. Der Text für d’Iladig isch no gli einisch gfunge gsi. Mir hei üs aber o es Gedicht in bärndütscher Sprach gwünscht. Das hei mir nach ere Vorlag in schriftdütscher Sprach sälber gmacht. So also isch das Chärtli langsam aber doch Stück für Stück entstande:

Vore druf het’s Föteli mit em Wäg. Drüber gleit wird es transparänts Papier, mit der Iladig, innefür mit em Gedicht. Ganz konventionell isch das nid, aber üs het das gfalle und immer öppe öppis nöis macht ds Läbe ja spannender. So hei mir üs das däicht. Uf der Innesyte vom Chärtli isch auso ds Gedicht u rächts näbedra es wyters Papier mit der Iladig z’gseh. Die Iladig isch wider us transparäntem Papier u 1.5cm zrügg gschnitte, so dass es es gäbigs Rändli git. Es Chlämmerli mit Härzform sorgt derfür, dass das Zetteli schön blibt, wo es häre ghört.

U ds Föteli? Das mues natürlich o no gseit si. Es het mängs Bildli brucht, bis mir z’fride si gsi. Zum einte hets zu üsem Motiv «Wäg» müesse passe; zum andere aber o no guet u gfelig müesse usgseh. Zum pröble si mir uf em Rämisgumme, are Ämme und im Wald gsi. Grad nüt het es drus gäh. Erscht deheim bim chriesiboum isch ds richtige Föteli entstande. E ganz e liebe Dank geht a Christine u Dani. Si hei mit viu Geduld die Föteli gmacht und üs zwäg ghulfe.

Schreibe einen Kommentar

Deine E-Mail-Adresse wird nicht veröffentlicht.