Nöizuezügerabe – Ja, das git es no hie z’Rüderswil u das isch e gfröiti Sach. Aui, wo nöi im heimelige Ämmitauer Dorf es Deheim funge hei, wärde vom Gmeindrat iiglade, erfahre mängs über ds Dorf u wärde am Schluss sogar bewirtet mit feine Sache us der Region. Hürigs Jahr het der Nöizuezügerabe i dr Pfrundschür grad näb der Chiuche stattgfunde. U die nöie Rüderswiler si cho: us Schwande, us Zollbrügg, vom Mützlebärg oder zmitz us em Dorf hei si der Wäg i d Schür funde u si häreghocket zum lose, was itz chunt. Uf sehr sympathischi und fründschaftlichi Art isch druf vo de Gmeindrätinne u Gmeindrät ds Dorf vorgstellt worde, derzue het es Bilder z’gseh gä vo de verschidene Plätz rund um Rüderswil. Mängs Wüssenswärts hei mir erfahre, vom Gwärb, vo de Schuele, vo de Dörfer rings um Rüderswil ume u no einiges meh. Bi der Vorstellig het natürlich o der berüemtischt Rüderswiler, der Niklous Löiebärger nid dörfe fähle, em Bärner Burefüehrer isch ja ds Dänkmal am Igang zum Dorf gwidmet.

Nach der Präsentation hei alli Neuzuezüger d’Glägeheit übercho, sich sälber mit es paar Wort vor z’stelle und uf das Abe het es es Apéro gäh. Das hei mir natürlich gnosse, hei nöis brichtet, hei Lüt lehre kenne u bi me Glesli Wi e schöni Zyt gha. Ja, es isch e gäbige Abe gsi u wo mir üs de wider uf e Heiwäg gmacht hei, isch gwüss i mängem Chopf der Gedanke läbändig gsi: Schön isch es, i üsem Rüderswil. Zum Schluss möcht i danke säge: allne, wo dä Abe müglich gmacht hei, bsunders em Rüderswiler Gmeindrat u der Christina, wo der Abe gleitet het.